HISTORIA DE LA PEÑA

La Colla Ademarista “Héctor Castresana 11” naz al fin del añu 2002 cula idea de tres collacios cansaos d’animar dende’l sou llugar nos escaños y que la xente-ys arreprendiese’l sou xeitu de llevantase de continu culos llances de la partida.

Nun entamu míranse dellos nomes, siempres de xugadores, y dende llou nacíos en Llión; atalántase entoncias facer la Colla a Xuanín García, refugándolo pur ser el xugador que más sofitu tien nel terrén de xuegu, pulo que nun precisa más. Tamién se fala de Diego Pérez Marne, refugándolo pur 2-1 nas votaciones, chegándose a Héctor Castresana, pivote llionés: el sou puxu, esfuerciu, sacrificiu, chera, lluita y llealtá avalan-y; tolas virtúes qu’un llionés debe arrexuntar. Alcuérdase entoncias qu’esti será’l nome de la Colla, acumpañándo-y de la sentencia “Orgullo Cazurro”.

Arrexuntaos cul xugador, pídise-y permisu pa usar el sou nome na Colla, chenando-y de gayola, poro collabora nos primeiros pasos de la nuesa historia ragalándonos el bombu, qu’inda güei caltenemos.

El día 6 de febreiru del añu 2003 apaez nel Palaciu los Deportes la Colla cun 18 presonas, cun lásticos blancos, un bombu y la pancarta que güei sigue presidiendo la nuesa Colla.

Nas temporadas arréu camúdase la color del lásticu a ruxu, la Colla chega a los 82 miembros, 5 bombos, una chueca, una bandeira de Llión de 30 metros cuadraos y 8 pancartas d’unos 15 m2 cun tolos títulos esistentes nas vitrinas ademaristas.

La Colla Ademarista Llionesa Héctor Castresana 11, meyor conocida como HECAS11, rexístrase de xeitu oficial como Asociación nel Ministeriu L’Interior al fin del añu 2004, convirtiéndose na 2a Colla más antigua del Palaciu, tres la PUA Llión.

Como calter cimeiro de la HECAS11 ta’l sofitu incondicional al equipu ensin parar d’animar en tolas partidas, adoutando como Hinu el “Ademar mi Fiel Amigo”. Acumpaña al equipu en viaxes a Torrevieja, Altea, Zaragoza, Alcobendas, Vigo, Cangas del Morrazo, Aranda de Douru, Almeria, Algeciras y Dinamarca nuna ocasión; en dúas a San Sebastián, Irún, Eibar, Barcelona y Hamburgu; en tres a Pontevedra; cuatru a Santander, Pamplona y Ciudad Real; y siete a Valladolí.

La HECAS11 cunta anguañu cun dous Socios d’Honor: D. Manuel Cadenas y D. Isidoro Martínez.

Sobresal tamién el feitu que, nas cabeiras ellecciones del club, esfoutose en tres direutivos de la Colla pa formar parte del Conseyu d’Alministración del Club.